Kjörskrá
Íslenskum ríkisborgurum sem hafa verið búsettir erlendis í meira en átta ár gert kleift að kjósa
Breyting á lögum um kosningar til Alþingis sem tók gildi í dag gerir íslenskum ríkisborgurum, sem hafa verið búsettir erlendis í meira en átta ár og höfðu ekki sótt um að verða teknir á kjörskrá fyrir 1. desember sl., kleift að kjósa í alþingiskosningunum 25. apríl nk. Sæki þeir um til Þjóðskrár í síðasta lagi 25. mars nk. geta þeir kosið í kosningunum í vor ef umsókn þeirra reynist fullnægjandi. Ef umsókn berst Þjóðskrá eftir að fresturinn rennur út verður viðkomandi ekki tekinn á kjörskrá í vor.
Þeir sem sendu umsókn til Þjóðskrár eftir 1. desember sl. og fram til dagsins í dag þurfa ekki að sækja sérstaklega um aftur. Þeir verða nú teknir á kjörskrá samkvæmt lagabreytingunni og mun Þjóðskrá tilkynna viðkomandi það sérstaklega. Umsóknareyðublað er að finna á vef Þjóðskrár.
--------------------------------------------------------------------------------
Sjá lög um kosningar til Alþingis nr. 24/2000 á vef Alþingis, www.althingi.is, og nýju breytinguna á lögunum nr. 7/2009 á vef Stjórnartíðinda, www.stjornartidindi.is.
Íslenskir ríkisborgarar sem búsettir eru erlendis geta sótt um að verða teknir á kjörskrá. Fylla þarf út eyðublaðið "Umsókn íslensks ríkisborgara sem búsettur er erlendis um að verða tekinn á kjörskrá". Umsóknina má senda sem símbréf (569 2949) eða með pósti.
Umsókn verður að hafa borist Þjóðskrá (ekki sendiráði eða ræðismannsskrifstofu) fyrir 1. desember til þess að umsækjandi geti öðlast kosningarrétt við alþingiskosningar og forsetakjör sem efnt yrði til fram að næsta 1. desember.
Skilyrði þess að maður sem á lögheimili utan Íslands eigi kosningarrétt við kosningar til Alþingis og við kjör forseta Íslands:
- Að hann hafi íslenskan ríkisborgararétt.
- Sé 18 ára eða eldri þegar kosning fer fram.
- Hafi einhvern tíma á ævinni átt lögheimili á Íslandi og ekki sé liðinn lengri tími en 8 ár frá því hann fluttist þaðan.
- Hafi sótt sérstaklega um að verða tekinn á kjörskrá, ef liðinn er lengri tími en 8 ár frá því hann átti lögheimili á Íslandi, talið frá 1. desember næstum fyrir kjördag.
Umsókn er fullnægjandi ef hún er:
- Undirrituð af umsækjanda sjálfum á eyðublað sem Þjóðskrá lætur í té.
- Staðfest af umsækjanda upp á æru og trú að hann sé enn íslenskur ríkisborgari.
- Útfyllt með fullu nafni umsækjanda, kennitölu hans, heimilisfangi utan Íslands, síðasta lögheimili á Íslandi og hvenær flutt var frá Íslandi.
Sé umsókn fullnægjandi tekur Þjóðskrá umsækjanda á kjörskrárstofn í því sveitarfélagi er hann átti síðast lögheimili og tilkynnir það sveitarstjórn og umsækjanda sjálfum. Verði umsækjandi tekinn á kjörskrá gildir sú ákvörðun í 4 ár frá 1. desember næstum á eftir að umsókn var lögð fram, en að þeim tíma liðnum fellur viðkomandi af kjörskrá hafi hann ekki sótt um aftur. Til þess að vera alltaf á kjörskrá þarf að endurnýja umsókn á fjögurra ára fresti.