Skráning barns
Þegar barn fæðist er það skráð í þjóðskrá og fær þá kennitölu. Sjúkrahúsin senda fæðingarskýrslur til Þjóðskrár Íslands.
Barn fætt erlendis
Íslenskir ríkisborgarar búsettir erlendis geta látið skrá börn sín í þjóðskrá. Senda þarf fæðingarvottorð frá skráningaraðilum í viðkomandi landi til Þjóðskrár Íslands (vottorð frá sjúkrahúsi gildir ekki). Á vottorðinu þarf að koma fram fæðingardagur barns, nöfn beggja foreldra og nafn barns. Ef barnið er ekki komið með nafn þarf að senda aftur fæðingarvottorð þegar það hefur fengið nafn. Barnið er skráð í þjóðskrá eins og nafn þess er skráð á fæðingarvottorði.
Barn kennt til móður
Ef barn er kennt til móður við fæðingu, en óskað er eftir því að kenna það til föður, þarf barnið að vera feðrað. Hægt er að ganga frá faðernisviðurkenningu hjá sýslumönnum (fæðingarvottorð þarf að hafa meðferðis frá Þjóðskrá Íslands). Einnig er barn feðrað ef foreldrar skrá sig í sambúð eða gifta sig eftir fæðingu þess. Kenninafni barns er síðan breytt til samræmis við skírnar- eða nafngjafarskýrslur.
Nöfn barna
Skylt er að gefa barni nafn áður en það verður 6 mánaða gamalt. Ef barn er skírt, sér viðkomandi prestur eða forstöðumaður trúfélags um að senda skírnarskýrslu til Þjóðskrár Íslands. Aðrir þurfa að tilkynna nafn barns til Þjóðskrár Íslands. Fylla þarf út eyðublaðið "Tilkynning um nafngjöf barns" sem liggur frammi í afgreiðslu Þjóðskrár Íslands, Borgartúni 21, einnig er hægt að fá það sent með pósti. Séu forsjármenn barns tveir skulu báðir undirrita tilkynninguna. Frumrit tilkynningar þarf að berast Þjóðskrá Íslands, Borgartúni 21.
Þau nöfn sem heimilt er að gefa barni eru á Mannanafnaskrá. Mannanafnanefnd úrskurðar um önnur nöfn.